إعلام سمك لبن تمرهندي...بقلم /عبير حسني

إعلام سمك لبن تمرهندي...بقلم /عبير حسني


منبر الإعلام تعرض إلى موجة شرسة من مدعي الإعلام والفكر و من شروط الجلوس على منبر الإعلام إحترام عقلية المشاهد وتقديم كل ما يفيده من توعية او فكر أو ثقافة والحفاظ على الأداب العامة ولكن ما نراه الأن لا يمت للإعلام ب صلة إعلام سمك سمك لبن تمرهندي ولقد إستوقفني بعض الكلمات

للشاعر(ياسر عبد الغفار)
عمك رفاعي
عمك رفاعي .. حاوي وواعي
طالع بينقر .. نازل بيفشر
و عاملي مصلح .. لأ واجتماعي

ع الشاشة وشه .. مليان بشاشة
إعلانه يبقي .. زبدة وبغاشة
صودا و كاكولة .. بتجيب هشاشة
سبوبة حلوة .. زي القماشة

حاوي و بيلعب .. وعليك بيصعب
تربط غليظك .. وبمية تشرب
وفر ف قوتك .. رفاعي يكسب

منشار مكوش .. عايز يحوش
لو فيه معارضة .. لازم يغلوش
والحق عنده .. بالصوت يوشوش

عمك رفاعي ..مربي دقنه
قاعد بينصح .. وناسي شأنه
قاعد بيفتي .. ومالي بطنه

والفتوي عنده .. صنعة وعمولة
يسهر ليلاتي .. مع واحدة حولة
وجوازة رابعة .. ويقول دى أولي

عمك رفاعي .. قاعد بينصح
وان حد لامه .. قوام بينطح
ابجني ابج .. ياهاقول وهافضح

عمال يحلل .. كدا ف الرياضة
والكدب عنده .. إدمان و عادة
فاتح جيوبه .. طالب زيادة

تلات ليالي .. قاعد يحلل
فين المساعد .. دا الجول تسلل
وفلان بيرقص ..علان يهلل

عمك رفاعي .. ممكن يضرك
شغل دماغك .. تلقاه يسرك
تمنع فلوسك .. يفضح ف سرك

قاعد مبحلق .. علي الصبايا
فاصل هنعرض .. حبة دعاية
م الصبح بدري .. قاعد معايا

عمك رفاعي .. عمال يطول
ارساله ماشي .. علي التسول
والزفة تحلي .. لو فيه ممول

عمك رفاعي .. فاتح اذاعة
ويقول ويشرح .. عن القناعة
وهمه كرشه .. ولو فيه مجاعة

عمك رفاعي .. بلا اي داعي
تاعب نافوخي .. جايب صداعي
طالع بيرغي .. نازل بيهري
الله يسامح .. عمك رفاعي .